మహబూబ్‌నగర్‌: జర్నలిస్టుల సంక్షేమం, ఆరోగ్య భద్రతకు తన వ్యక్తిగత ఖర్చుతో హెల్త్‌కార్డులు, ప్రమాద బీమా కల్పించడంతోపాటు పూర్తి సహకారం అందిస్తానని మధుసూధన్‌రెడ్డి హామీ ఇచ్చారు.
శనివారం మహబూబ్‌నగర్‌లోని దేవరకద్ర నియోజకవర్గ కేంద్రంలో ఇండియన్‌ జర్నలిస్ట్‌ యూనియన్‌తో అనుబంధంగా ఉన్న తెలంగాణ యూనియన్‌ ఆఫ్‌ వర్కింగ్‌ జర్నలిస్ట్స్‌ (టీయూడబ్ల్యూజే) ప్రతినిధులు ఎమ్మెల్యేను కలిసి జర్నలిస్టులకు హెల్త్ కార్డులు ఇవ్వాలని కోరుతూ వినతి పత్రం అందించగా ఈ మేరకు హామీ ఇచ్చారు.
వారి అభ్యర్థనపై సానుకూలంగా స్పందించిన ఎమ్మెల్యే జర్నలిస్టుల సంక్షేమం, వారి కుటుంబాల ఆరోగ్య భద్రతకు తాను ఎల్లవేళలా కట్టుబడి ఉన్నానని పేర్కొన్నారు. జర్నలిస్టులకు అవసరమైన ఆరోగ్య ప్రయోజనాలు అందేలా ప్రభుత్వం అందించే సహకారంతో పాటు వ్యక్తిగతంగా కూడా సహాయ సహకారాలు అందిస్తానని చెప్పారు.
కొత్త అక్రిడిటేషన్‌ కార్డులు మంజూరు కాగానే నియోజకవర్గంలోని అర్హులైన జర్నలిస్టులందరికీ తన సొంత ఖర్చులతో హెల్త్‌కార్డులు అందజేస్తామని ఎమ్మెల్యే ప్రకటించారు. తన వ్యక్తిగత నిధులతో జర్నలిస్టులకు ప్రమాద బీమా కవరేజీ కూడా కల్పిస్తామని హామీ ఇచ్చారు.
జర్నలిస్టులకు, వారి కుటుంబాలకు, ముఖ్యంగా ఆరోగ్య భద్రతకు సంబంధించిన విషయాల్లో తాను అండగా ఉంటానని, మీడియా సోదరులకు మద్దతు ఇవ్వడంలో రాజీపడబోనని ఆయన హామీ ఇచ్చారు.
ఈ సమావేశానికి టీయూడబ్ల్యూజే(ఐజేయూ) నాయకులు, పలువురు జర్నలిస్టులు హాజరై ఎమ్మెల్యే హామీపై హర్షం వ్యక్తం చేస్తూ ఎమ్మెల్యే నిర్ణయాన్ని స్వాగతించారు.
