నాగర్‌కర్నూల్‌: ఇటీవల జరిగిన మున్సిపల్ ఎన్నికల్లో రంగారెడ్డి జిల్లా కేశంపూర్‌లో రెడ్డి జాగృతి అధ్యక్షుడు బుట్టెం మాధవరెడ్డిని బీఆర్ఎస్ పార్టీ కౌన్సిలర్‌ అభ్యర్థిగా బీ-ఫారం జారీ చేసిందని బీసీ నేత వేముల సత్యశీల సాగర్‌ విమర్శించారు. ముఖ్యంగా విద్య, ఉద్యోగ, చట్టసభల్లో 42% రిజర్వేషన్లు కల్పించాలని డిమాండ్ చేస్తూ రాష్ట్రవ్యాప్తంగా బీసీ సంఘాలు నిరంతర నిరసనలు చేపడుతున్న తరుణంలో ఈ నిర్ణయం బీసీ వర్గాన్ని దిగ్భ్రాంతికి గురి చేసిందన్నారు. 42% బీసీ రిజర్వేషన్లను వ్యతిరేకిస్తూ మాధవరెడ్డి కోర్టులో పిటిషన్ వేశారని, బీసీ ప్రయోజనాలకు వ్యతిరేకంగా నిలబడిన వ్యక్తికి బీఆర్ఎస్ పార్టీ టికెట్ ఎలా ఇస్తారని ప్రశ్నించారు. బీసీ ఓటర్లు అభ్యర్థిని ఓడించి బీసీ వ్యతిరేక శక్తులకు వ్యతిరేకంగా స్పష్టమైన తీర్పు చెప్పారన్నారు. గత డిసెంబర్‌లో జరిగిన పంచాయతీ ఎన్నికల్లో బీఆర్ఎస్ బలపరిచిన అభ్యర్థులు అధికార పార్టీకి గట్టి పోటీ ఇచ్చి అనేక సర్పంచ్ పదవులు గెలుచుకున్నారని గుర్తు చేశారు.
అయితే ఇటీవల జరిగిన మున్సిపల్ ఎన్నికల్లో బీసీ ఓటర్లు భిన్నమైన తీర్పునిచ్చారని, దీనిని బీఆర్ఎస్ రాష్ట్ర నాయకత్వం సీరియస్‌గా తీసుకోవాలన్నారు.
భవిష్యత్తులో జరిగే ఎన్నికల్లో మంచి ఫలితాలు రావాలంటే బీసీ రిజర్వేషన్లు, వెనుకబడిన తరగతుల రాజకీయ సాధికారతపై రాజకీయ పార్టీలు దృష్టి సారించాలని డిమాండ్ చేశారు.
