నైరుతి రుతుపవనాలు కేరళకు చేరుకున్నాయి, భారీ వర్షాలు ఆంధ్రప్రదేశ్ రాష్ట్రంలోని కోస్తా ప్రాంతాలను అతలాకుతలం చేస్తున్నాయి, ఈ రుతుపవనాలు వచ్చే వారంలో తెలంగాణలోకి ప్రవేశించనున్నాయని తెలిసింది. అయితే గత సంవత్సరాలతో పోలిస్తే ఈసారి నైరుతి రుతుపవనాల రాక కాస్త ఆలస్యమైంది.
నైరుతి రుతుపవనాలు మే 26 నాటికి కేరళ తీరాన్ని తాకే అవకాశం ఉందని భారత వాతావరణ శాఖ (ఐఎండీ) తొలుత అంచనా వేసింది. అయితే ఎల్‌నినో ప్రభావంతో ఆ అంచనాలు తారుమారయ్యాయి.
కాగా, రుతుపవనాల ప్రభావంతో ఇప్పటికే కేరళలోని పలు ప్రాంతాల్లో భారీ వర్షాలు కురుస్తున్నాయి. అలప్పుజా, కొట్టాయం, ఎర్నాకులం జిల్లాలకు వాతావరణ శాఖ ‘ఆరెంజ్ అలర్ట్’ జారీ చేసింది. అలాగే, నైరుతి రుతుపవనాల ప్రభావంతో పొరుగున ఉన్న తమిళనాడులోని 15 జిల్లాల్లో రాబోయే కొద్ది గంటల్లో భారీ వర్షాలు కురిసే అవకాశం ఉందని IMD హెచ్చరిక జారీ చేసింది.
ఎల్‌నినో ప్రభావంతో ఈ ఏడాది నైరుతి రుతుపవనాల సీజన్‌లో (జూన్-సెప్టెంబర్) సాధారణం కంటే తక్కువ వర్షపాతం నమోదవుతుందని వాతావరణ శాఖ అంచనా వేసింది.
