నాగర్ కర్నూల్: తెలంగాణ రాష్ట్ర ఎన్నికల కమిషనర్ రాణి కుముదిని బుధవారం నాగర్ కర్నూల్ జిల్లాలో పర్యటించారు. జిల్లా కలెక్టరేట్‌కు చేరుకున్న ఆమెకు జిల్లా కలెక్టర్ హేమంత కేశవ్ పాటిల్, పోలీసు సూపరింటెండెంట్ డాక్టర్ సంగ్రామ్ సింగ్ జి. పాటిల్ పుష్పగుచ్ఛాలు అందించి ఘనస్వాగతం పలికారు.

అనంతరం కలెక్టరేట్‌లోని కలెక్టర్‌ ఛాంబర్‌లో రాష్ట్ర ఎన్నికల కమిషనర్‌ జిల్లా కలెక్టర్‌, ఎస్పీలతో సమావేశం నిర్వహించారు. ఈ సందర్భంగా జిల్లాలో కొనసాగుతున్న స్పెషల్ ఇంటెన్సివ్ రివిజన్ (ఎస్‌ఐఆర్) ప్రక్రియ పురోగతిని ఆమె సమీక్షించారు.

జిల్లాలో పలు పరిపాలనా కార్యకలాపాలు, కొనసాగుతున్న కార్యక్రమాలపై అధికారులు కమిషనర్‌కు వివరించారు. ఓటర్ల జాబితా నవీకరణ, కొత్త ఓటర్ల నమోదు, చిరునామా వివరాల సవరణ, మరణించిన ఓటర్ల తొలగింపు, అర్హులైన ప్రతి పౌరుడిని ఓటరు జాబితాలో చేర్చేందుకు తీసుకుంటున్న చర్యలను ఆమె అడిగి తెలుసుకున్నారు.

ఎన్నికల సంఘం జారీ చేసిన మార్గదర్శకాలను కచ్చితంగా పాటిస్తూనే పారదర్శకంగా, నిష్పక్షపాతంగా ఎస్‌ఐఆర్‌ కార్యక్రమాన్ని నిర్వహించాలని కమిషనర్‌ అధికారులను ఆదేశించినట్లు సమాచారం.

జిల్లాలో ఎస్‌ఐఆర్‌ ప్రక్రియ అమలు, బూత్‌ లెవల్‌ అధికారుల పనితీరు, ప్రజల నుంచి వచ్చిన దరఖాస్తుల స్వీకరణ, పరిశీలనకు అనుసరిస్తున్న విధానాలను జిల్లా కలెక్టర్‌ హేమంత కేశవ్‌ పాటిల్‌ వివరించారు. జిల్లాలో ఎన్నికలకు సంబంధించిన కార్యకలాపాలు సజావుగా సాగేందుకు తీసుకుంటున్న పాలనాపరమైన చర్యలను కమిషనర్‌కు వివరించారు.