హైదరాబాద్: నగరంలో పచ్చదనం పెంపొందించేందుకు కృషి చేయాలని మల్కాజిగిరి మున్సిపల్‌ కార్పొరేషన్‌ కమిషనర్‌ వినయ్‌కృష్ణారెడ్డి అధికారులను ఆదేశించారు. బుధవారం అల్వాల్‌లోని ఓల్డ్ అల్వాల్ రోడ్డు, కందాడి ఎన్క్లేవ్, సరస్వతి కాలనీ, మచ్చ బొల్లారం, విజయ్ విహార్ ఎన్క్లేవ్, రైల్వే ఎంప్లాయీస్ కాలనీ ఫేజ్-1 ప్రాంతాలను అధికారులు, సిబ్బంది పరిశీలించారు. ఈ సందర్భంగా అల్వాల్‌లోని ఇందిరాగాంధీ విగ్రహం సమీపంలోని అల్వాల్ రోడ్డును కమిషనర్‌ పరిశీలించారు.
పారిశుధ్య కార్మికులతో మాట్లాడి రోడ్డు క్లీనింగ్‌కు వినియోగించే యంత్రాలు, పరికరాల పనితీరును సమీక్షించారు. రోడ్లను పరిశుభ్రంగా ఉంచడంతోపాటు పారిశుద్ధ్య కార్యక్రమాల సామర్థ్యాన్ని పెంపొందించడంలో పరికరాల ప్రభావంపై ఆయన ఆరా తీశారు.
అందుబాటులో ఉన్న పరికరాలను సమర్థవంతంగా వినియోగించుకోవాలని, ప్రభుత్వ స్థలాలను పరిశుభ్రంగా ఉంచుకోవాలని అధికారులు, సిబ్బందికి సూచించారు. అలాగే అల్వాల్‌లోని ఓల్డ్ అల్వాల్ రోడ్డు, కందాడి ఎన్క్లేవ్, సరస్వతి కాలనీ ప్రాంతాల్లో వర్షపు నీటి కాలువలు, పూడికతీత కాలువలను పరిశీలించారు.
