వనపర్తి : వనపర్తి నియోజకవర్గంలోని ఏదుల రిజర్వాయర్ నిర్మాణంలో నీట మునిగి నిర్వాసితులైన కొంకలపల్లి గ్రామానికి చెందిన 47 మంది లబ్ధిదారులకు ఇళ్ల నిర్మాణానికి ప్రభుత్వం రూ.2.34 కోట్లు మంజూరు చేసింది.
శుక్రవారం స్థానిక ఎమ్మెల్యే తుడి మేఘారెడ్డి లబ్ధిదారులకు చెక్కులను పంపిణీ చేశారు. రిజర్వాయర్ బాధిత కుటుంబాలకు ఎల్లవేళలా అండగా ఉంటానని, వారి సమస్యల పరిష్కారానికి కృషి చేస్తానని అన్నారు.
ఈ విషయాన్ని ముఖ్యమంత్రి రేవంత్‌రెడ్డి దృష్టికి తీసుకెళ్లి సాగుభూమి లేదా ఇళ్లు కోల్పోయిన ప్రతి కుటుంబానికి పూర్తి స్థాయిలో పరిహారం అందేలా కృషి చేస్తానన్నారు.
ప్రజా సమస్యల పరిష్కారమే ప్రభుత్వ ప్రధాన ధ్యేయమని, బాధిత కుటుంబాలకు న్యాయం జరిగే వరకు ఆదుకుంటామని ఎమ్మెల్యే హామీ ఇచ్చారు.
వనపర్తి మార్కెట్‌ యార్డు చైర్మన్‌, మున్సిపల్‌ వైస్‌ చైర్మన్‌ మధుసూదన్‌గౌడ్‌, గోపాల్‌పేట ఉమ్మడి మండల మార్కెట్‌ యార్డు వైస్‌ చైర్మన్‌ సత్యశీలారెడ్డి, రేవల్లి మండల అధ్యక్షుడు సుల్తాన్‌, సర్పంచ్‌ బాలనాగయ్య, RDO, MRO, పార్టీ నాయకులు, కార్యకర్తలు, అధికారులు పాల్గొన్నారు.
