సుప్రీంకోర్టు ఆదేశాలను ఉల్లంఘించినందుకు కాంగ్రెస్ ప్రభుత్వ చర్యను కార్మిక సంఘాలు వ్యతిరేకించడంతో శుక్రవారం వరంగల్‌లోని ఆజం జాహీ మిల్ భూముల వేలం హై డ్రామాకు దారితీసింది.
ప్రచురించబడిన తేదీ – 26 జూన్ 2026, 09:58 PM
వరంగల్: వరంగల్‌లోని చారిత్రాత్మకమైన ఆజం జాహీ మిల్లు భూములను వేలం వేయాలన్న కాంగ్రెస్ ప్రభుత్వ నిర్ణయాన్ని కార్మిక సంఘాలు తీవ్రంగా వ్యతిరేకించడంతో శుక్రవారం జరిగిన వేలం కార్యక్రమం తీవ్ర ఉద్రిక్తతకు దారి తీసింది.
సుప్రీంకోర్టు తీర్పును ధిక్కరించి వేలంపాటను కొనసాగించాలని ప్రభుత్వం నిర్ణయించడం అన్యాయమని కార్మికులు పేర్కొన్నారు. కాకతీయ అర్బన్ డెవలప్‌మెంట్ అథారిటీ (కుడా) ఆధ్వర్యంలో 46 ప్లాట్ల కోసం నిర్వహిస్తున్న భూముల వేలాన్ని వారు అడ్డుకున్నారు.
నిరసన సమయంలో కార్మిక నాయకుడు గద్దల సంజీవ సమీపంలోని వాటర్ ట్యాంక్ ఎక్కి డీజిల్ పోసుకుని ఆత్మహత్యాయత్నానికి పాల్పడ్డాడు. కొందరు నిరసనకారులు రఘు, యశోద, దశరథం కూడా ట్యాంక్ ఎక్కి ప్రభుత్వానికి వ్యతిరేకంగా పెద్ద పెట్టున నినాదాలు చేశారు.
దీంతో ఘటనా స్థలంలో తీవ్ర ఉద్రిక్త వాతావరణం నెలకొంది. పోలీసులు రంగప్రవేశం చేసి చాకచక్యంగా వారిని కిందకు దించడంతో అందరూ ఊపిరి పీల్చుకున్నారు. బీజేపీ నేత ఎర్రబెల్లి ప్రదీప్‌రావు సంఘటనా స్థలానికి చేరుకుని ఆందోళన చేస్తున్న కార్మికులకు సంఘీభావం తెలిపారు.
ఒకప్పుడు మిల్లుపై ఆధారపడి జీవనోపాధి పొంది స్వచ్ఛంద పదవీ విరమణ పథకం (వీఆర్‌ఎస్‌)ను ఎంచుకున్న సుమారు 318 మంది కార్మికులకు మిల్లు స్థలంలో ఇళ్ల స్థలాలు కేటాయించాలని నాయకులు డిమాండ్ చేశారు.
కోర్టు ఆదేశాలను బేఖాతరు చేయడం, కార్మికుల హక్కులను కాలరాయడం, విలువైన భూములను కార్పొరేట్ సంస్థలకు ధారాదత్తం చేసే ప్రయత్నాలు చేస్తే సహించేది లేదని కార్మిక సంఘాల నాయకులు స్పష్టం చేశారు. కార్మికులకు న్యాయం జరిగే వరకు తమ పోరాటం ఆగదని స్పష్టం చేశారు.
హైకోర్టు, సుప్రీంకోర్టు సూచించిన విధంగా లక్ష్మీపురం, ఖిలా వరంగల్ ప్రాంతాల్లోని నిర్దిష్ట సర్వే నంబర్లలోని కార్మికులకు భూములు కేటాయించాలని డిమాండ్ చేస్తూ కార్మికులు చాలా కాలంగా నిరసనలు చేస్తుండటం గమనార్హం.
