ప్రభుత్వ కార్యాలయాల్లో పనిచేసే అధికారులు, సిబ్బంది అందరూ కచ్చితంగా సమయపాలన పాటించి ప్రజాసేవలు సమర్థవంతంగా అందేలా చూడాలని జిల్లా కలెక్టర్ హరిత మంగళవారం ఉద్ఘాటించారు. సమీకృత కలెక్టరేట్ భవనంలో పనిచేస్తున్న జిల్లా భూ సర్వే అధికారి కార్యాలయాన్ని, జిల్లా సహకార అధికారి కార్యాలయాన్ని ఆమె ఆకస్మికంగా తనిఖీ చేశారు.
ఈ సందర్భంగా కలెక్టర్ సిబ్బంది హాజరు రిజిస్టర్లను పరిశీలించి, ఉద్యోగుల హాజరు వివరాలను అడిగి తెలుసుకున్నారు. పరిపాలనా సామర్థ్యాన్ని మెరుగుపరచడానికి మరియు ప్రజలకు సమర్థవంతంగా సేవ చేయడానికి సమయపాలన పాటించడం చాలా అవసరమని ఆమె నొక్కి చెప్పారు. నిర్దేశించిన సమయపాలన పాటించని సిబ్బందిపై కఠిన చర్యలు తీసుకుంటామని ఆమె హెచ్చరించారు. ఈ తనిఖీల్లో సంబంధిత శాఖల అధికారులు, ఉద్యోగులు పాల్గొన్నారు.
