హైదరాబాద్‌లో గత కొన్ని రోజులుగా ఎడతెరిపి లేకుండా కురుస్తున్న వర్షాల కారణంగా మూసీ నదికి నీటి ప్రవాహం పెరిగింది. పరివాహక ప్రాంతాల నుంచి నదిలోకి భారీగా వరదనీరు వచ్చి చేరుతుండడంతో నదిలో నీటి మట్టం పెరుగుతోంది. ఈ నేపథ్యంలో మూసీ ప్రాజెక్టు పరిస్థితి, అందులోని నీటి మట్టాలపై అధికారులు వివరాలను విడుదల చేశారు.
తెలంగాణలోని మూసీ ప్రాజెక్ట్ (మూసీ రిజర్వాయర్) పూర్తిస్థాయి రిజర్వాయర్ లెవల్ (ఎఫ్‌ఆర్‌ఎల్) 645 అడుగులు, నిల్వ సామర్థ్యం 4.46 టీఎంసీలు. ఇటీవల కురిసిన వర్షాల నుంచి పరీవాహక ప్రాంతాల నుంచి నీటి ప్రవాహం క్రమంగా పెరుగుతుండడంతో ప్రస్తుతానికి ప్రాజెక్టులో నీటిమట్టం 638 అడుగులుగా ఉంది.
ప్రాజెక్టులో 2.88 టీఎంసీల నీరు నిల్వ ఉంది. ప్రాజెక్టులోకి 20 క్యూసెక్కుల నీరు వస్తున్నప్పటికీ మట్టాలు తగ్గించేందుకు 727 క్యూసెక్కుల నీటిని దిగువకు వదులుతున్నారు. ఈ నేపథ్యంలో మూసీ పరివాహక ప్రాంతాలు, నదీ తీరాల ప్రజలు అప్రమత్తంగా ఉండాలని అధికారులు హెచ్చరించారు.
