హైదరాబాద్‌: అక్షరాస్యత శాతాన్ని పెంపొందించేందుకు, ప్రభుత్వ పాఠశాలల్లో చదువుతున్న నిరుపేద విద్యార్థులు ఆర్థిక ఇబ్బందులతో చదువు మానేయకూడదనే ఉద్దేశంతో కేంద్రం ప్రతిష్ఠాత్మకంగా మధ్యాహ్న భోజన పథకాన్ని ప్రారంభించిందని తెలంగాణ రాష్ట్ర భాజపా అధ్యక్షుడు ఎన్‌.రామచందర్‌రావు అన్నారు.
ఆదివారం ఇందిరాపార్క్ ధర్నా చౌక్‌లో మధ్యాహ్న భోజన కార్మికులు, ఏజెన్సీల సంఘం ఆధ్వర్యంలో నిర్వహించిన నిరసన కార్యక్రమంలో ఆయన ప్రసంగిస్తూ కార్మికులకు సంఘీభావం తెలిపారు. పిల్లలకు భోజనం పెట్టాలనే ఉదాత్తమైన పని చేస్తున్న 54 వేల మంది మధ్యాహ్న భోజన కార్మికుల న్యాయమైన డిమాండ్లను రాష్ట్ర ప్రభుత్వం వెంటనే పరిష్కరించాలని డిమాండ్ చేశారు.
మధ్యాహ్న భోజన కార్మికులకు నెలకు రూ.10వేలు గౌరవ వేతనం అందజేస్తామని ఎన్నికల మ్యానిఫెస్టోలో ఇచ్చిన హామీని కాంగ్రెస్ ప్రభుత్వం నిలబెట్టుకోలేదని విమర్శించారు.కాంగ్రెస్ అధికారంలోకి వచ్చి రెండున్నరేళ్లు గడుస్తున్నా మధ్యాహ్న కూలీలు అప్పుల ఊబిలో కూరుకుపోవడం ఆందోళన కలిగిస్తోందని విమర్శించారు. నిత్యావసర వస్తువులు, కూరగాయలు, కోడిగుడ్ల ధరలు విపరీతంగా పెరిగినా వారి పారితోషికంలో మార్పు రాకపోవడంతో తీవ్ర అవస్థలు పడుతున్నారు.
ప్రస్తుతం అందజేస్తున్న రూ.3వేలు గౌరవ వేతనం ఇవ్వడంలో ప్రభుత్వం జాప్యం చేస్తోందని మండిపడ్డారు. పెండింగ్‌లో ఉన్న బకాయిలన్నింటినీ కలిపి నేరుగా కార్మికుల బ్యాంకు ఖాతాల్లోనే – ముఖ్యమంత్రిగా బాధ్యతలు స్వీకరించిన రేవంత్‌రెడ్డి హామీ ఇచ్చిన రూ.10,000 వేతనాల పెంపును వెంటనే జమ చేయాలని రాంచందర్‌రావు డిమాండ్ చేశారు.
కార్మికులకు అండగా నిలిచి వారి డిమాండ్లను నెరవేర్చాలని కోరుతూ బిజెపి తరపున ముఖ్యమంత్రికి స్వయంగా లేఖ రాస్తానని కార్మికులకు హామీ ఇచ్చారు. ఈ పోరాటంలో ధైర్యాన్ని కోల్పోవాల్సిన అవసరం లేదని, వారి హక్కులను కాపాడుకునేందుకు తాము చేసే పోరాటంలో బీజేపీ ఎప్పుడూ అండగా ఉంటుందని ఆయన వారికి భరోసా ఇచ్చారు.
