హైదరాబాద్: బడ్జెట్ అవసరాలకు అనుగుణంగా అదనపు ఆదాయ వనరుల సమీకరణపై దృష్టి సారించాలని, రాష్ట్ర ఆర్థిక వృద్ధిని వేగవంతం చేసేందుకు లక్ష్యాల మేరకు నిధులు సమకూరేలా చూడాలని ఉప ముఖ్యమంత్రి, ఆర్థిక మంత్రి మల్లు భట్టి విక్రమార్క అధికారులను ఆదేశించారు.
భట్టి అధ్యక్షతన శనివారం ‘వనరుల సమీకరణ మంత్రివర్గ ఉపసంఘం’ ఉన్నతస్థాయి సమావేశం జరిగింది. ఈ సమావేశానికి కమిటీ సభ్యుడు, ఐటీ, పరిశ్రమల శాఖ మంత్రి దుద్దిళ్ల శ్రీధర్‌బాబు హాజరయ్యారు.
రాష్ట్రవ్యాప్తంగా ల్యాండ్ మానిటైజేషన్ మరియు ల్యాండ్ పూలింగ్ ప్రక్రియలను వేగవంతం చేయాలని సబ్ కమిటీ నిర్ణయించింది.
ఇందుకు సంబంధించి హెచ్‌ఎండీఏ పరిధిలోని ప్రభుత్వ భూములను సమర్ధవంతంగా వినియోగించుకునేందుకు అధికారులు రూపొందించిన సమగ్ర ప్రణాళికపై సవివరంగా చర్చించారు.
ఉప్పల్ భగాయత్ మోడల్ తరహాలో పారదర్శకమైన నమూనాలను అనుసరించి అదనపు ప్రాంతాల్లో ల్యాండ్ పూలింగ్ కు అవకాశాలను గుర్తించాలని అధికారులను ఆదేశించారు.
రంగారెడ్డి, మేడ్చల్‌–మల్కాజిగిరి, యాదాద్రి భువనగిరి జిల్లా కలెక్టర్లు ప్రభుత్వ భూములను గుర్తించి ఆయా జిల్లాల్లో ల్యాండ్‌పూలింగ్‌కు సంబంధించిన సాధ్యాసాధ్యాలను పరిశీలించాలని ప్రత్యేకంగా ఆదేశించారు. బడ్జెట్ లక్ష్యాలను సాధించడానికి అందుబాటులో ఉన్న అన్ని ఆదాయ వనరులను పూర్తిగా ఉపయోగించుకోవాలని ఆయన నొక్కి చెప్పారు. ముందుగా నిర్ణయించిన సమయపాలన (క్యాలెండర్‌)ను కచ్చితంగా పాటించాలని, ఆదాయాన్ని పెంపొందించేందుకు కృషి చేయాలని అధికారులను ఆదేశించారు. రాష్ట్ర ఆర్థిక స్థితిని బలోపేతం చేసేందుకు అన్ని ప్రభుత్వ శాఖల మధ్య పటిష్టమైన సమన్వయం ఉండాలని కూడా ఆయన పిలుపునిచ్చారు.
ఈ సమావేశంలో మునిసిపల్ అడ్మినిస్ట్రేషన్ & అర్బన్ డెవలప్‌మెంట్ (MA&UD), హైదరాబాద్ మెట్రోపాలిటన్ డెవలప్‌మెంట్ అథారిటీ (HMDA), పరిశ్రమలు, ఎక్సైజ్, మైనింగ్, రెవెన్యూ, రవాణా, స్టాంపులు & రిజిస్ట్రేషన్ మరియు వాణిజ్య పన్నులు వంటి కీలకమైన ఆదాయాన్ని అందించే విభాగాల్లో పురోగతిని సమీక్షించారు.
