హనుమకొండ: 99 రోజుల “ప్రజాపాలన – ప్రగతి ప్రాణాలిక” కార్యక్రమంలో భాగంగా వర్ధన్నపేట మండలం కొత్తపేట గ్రామంలో జరిగిన గ్రామసభలో ఎమ్మెల్యే కేఆర్ నాగరాజు, వరంగల్ జిల్లా కలెక్టర్ సత్య శారదతో కలిసి దేవాదాయ శాఖ మంత్రి కొండా సురేఖ పాల్గొన్నారు. సర్పంచ్ సునీత అధ్యక్షతన జరిగిన సమావేశంలో మంత్రి మాట్లాడుతూ ప్రజల అవసరాలను అర్థం చేసుకుని నిజమైన ఆర్థిక భరోసా కల్పిస్తూ ప్రభుత్వం వినూత్న సంక్షేమ పథకాలకు రూపకల్పన చేస్తుందన్నారు.
గత రెండేళ్లుగా చేపట్టిన అభివృద్ధి, సంక్షేమ కార్యక్రమాలను అట్టడుగు స్థాయి ప్రజలకు తెలియజేయడమే గ్రామ సభల ముఖ్య ఉద్దేశం.
గ్రామ, వార్డు సమావేశాల ద్వారా ప్రభుత్వం నేరుగా ప్రజలకు చేరవేసి వారి సమస్యలను గుర్తించి సత్వరమే పరిష్కరిస్తున్నదని ఆమె తెలిపారు. 99 రోజుల కార్యక్రమంలో భాగంగా గ్రామ, మండల, జిల్లా, రాష్ట్ర స్థాయిల్లో ప్రభుత్వ కార్యక్రమాలను వివరించేందుకు, ప్రజా సమస్యల పరిష్కారానికి చర్యలు తీసుకుంటున్నారు.
ఆరు హామీలు, ఉచిత బస్సు ప్రయాణం, 200 యూనిట్ల వరకు ఉచిత విద్యుత్, ఉచిత వైద్య సేవలు, ఇందిరమ్మ గృహాలు వంటి పథకాలు ప్రజల జీవన ప్రమాణాలను గణనీయంగా మెరుగుపరుస్తున్నాయని ఆమె పేర్కొన్నారు.
