తెలంగాణలో ఎమ్మెల్యేల ఫిరాయింపులపై రాజకీయ దుమారం రేపిన వ్యాజ్యాన్ని సుప్రీంకోర్టు నేడు విచారించనుంది. జస్టిస్‌లు సంజయ్ కరోల్, అగస్టిన్ జార్జ్‌లతో కూడిన ధర్మాసనం ఢిల్లీలోని సుప్రీంకోర్టులో ఈ అంశాన్ని సమీక్షించనుంది.
శాసనసభ్యులు పార్టీలు మారలేదని ఏడుగురు ఎమ్మెల్యేలపై అనర్హత పిటిషన్లను కొట్టివేస్తూ తెలంగాణ అసెంబ్లీ స్పీకర్ వెలువరించిన తీర్పు నేపథ్యంలో తెలంగాణలో రాజకీయ వాతావరణం మరింత వివాదాస్పదంగా మారింది. ఈ నిర్ణయంపై అభ్యంతరాలు చెలరేగడంతో విషయం సుప్రీంకోర్టుకు వెళ్లింది.
గతంలో జరిగిన విచారణలో, కోర్టు ధిక్కార పిటిషన్‌పై నాలుగు వారాల వ్యవధిలో సమాధానం ఇవ్వాలని స్పీకర్‌ను ఆదేశించిన సుప్రీంకోర్టు, స్టాండింగ్ కౌన్సెల్ ద్వారా స్పీకర్‌కు నోటీసులు జారీ చేయాలని ఆదేశించింది. ఎమ్మెల్యేలపై అనర్హత వేటు వేసే అధికారం స్పీకర్‌కు లేదా కోర్టుకు ఉందా అనే దానిపై ధర్మాసనం ముఖ్యమైన ప్రశ్నలను లేవనెత్తింది.
