వైరా (ఖమ్మం): వైరాలో కొనసాగుతున్న యంగ్ ఇండియా ఇంటిగ్రేటెడ్ రెసిడెన్షియల్ స్కూల్ నిర్మాణ పనులను ఖమ్మం జిల్లా కలెక్టర్ అనుదీప్ దురిశెట్టి పరిశీలించి ఏప్రిల్ నెలాఖరు నాటికి సీనియర్ హాస్టల్ భవనాలు బేస్‌మెంట్ స్థాయికి చేరేలా చూడాలని అధికారులను ఆదేశించారు. సమీకృత గురుకుల ప్రాజెక్టు కింద నిర్మిస్తున్న జూనియర్‌, సీనియర్ హాస్టల్ బ్లాకుల పురోగతిని ఆయన సమీక్షించారు. పనులు నత్తనడకన సాగుతున్నాయని, పాత కట్టడాలను త్వరగా కూల్చివేసి పునాది పనులను సకాలంలో పూర్తి చేయాలని కలెక్టర్ అధికారులను ఆదేశించారు.
జిల్లాలోని ఐదు నియోజకవర్గాల్లో ఇదే తరహాలో అకడమిక్ బ్లాకులు, హాస్టళ్లు, స్టాఫ్ క్వార్టర్‌లతో కూడిన సమీకృత పాఠశాలలు నిర్మిస్తున్నామని, భూసమస్యలు పరిష్కరించామని తెలిపారు.
