మహబూబ్ నగర్: కాంగ్రెస్ జాతీయ నాయకుడు, లోక్‌సభలో ప్రతిపక్షనేత రాహుల్‌గాంధీ ఆదేశాల మేరకు ముఖ్యమంత్రి రేవంత్‌రెడ్డి ఆధ్వర్యంలో తెలంగాణలో కుల గణన పూర్తయిన సందర్భంగా టౌన్‌ కాంగ్రెస్ పార్టీ ఆధ్వర్యంలో మహబూబ్‌నగర్‌లోని తెలంగాణ చౌరస్తాలో కార్యక్రమం నిర్వహించారు.
ఈ సందర్భంగా కాంగ్రెస్ పార్టీ జాతీయ అధ్యక్షుడు మల్లికార్జున్ ఖర్గే, మాజీ అధ్యక్షురాలు సోనియా గాంధీ, రాహుల్ గాంధీ, ముఖ్యమంత్రి రేవంత్ రెడ్డి చిత్రపటాలకు పార్టీ నాయకులు క్షీరాభిషేకం చేశారు.
ఈ సందర్భంగా జరిగిన కార్యక్రమంలో పట్టణ కాంగ్రెస్ పార్టీ అధ్యక్షుడు, ముడా చైర్మన్‌ లక్ష్మణ్‌ యాదవ్‌ మాట్లాడుతూ ముఖ్యమంత్రి రేవంత్ రెడ్డి నిబద్ధతతో కుల గణనను విజయవంతంగా పూర్తి చేశారని కొనియాడారు. కేంద్రంలోని ఎన్‌డిఎ ప్రభుత్వం కుల గణన కోసం రాహుల్ గాంధీ పదేపదే డిమాండ్‌ చేస్తున్నప్పటికీ కేంద్రం చర్యలు తీసుకోలేదని, అగ్రవర్ణాలకు ప్రాధాన్యతనిస్తోందని, ఎస్సీ, ఎస్టీ, బీసీ, మైనారిటీ వర్గాలను నిర్లక్ష్యం చేస్తోందని విమర్శించారు.
అన్ని వర్గాలకు సమాన హక్కులు, గౌరవం కల్పించేందుకు కాంగ్రెస్ పార్టీ కట్టుబడి ఉందని, ఆ దిశగా కుల గణన ఒక ముఖ్యమైన ముందడుగు అని ఆయన పేర్కొన్నారు.
కార్యక్రమంలో నగర మేయర్ గుమ్మల మమత, డిప్యూటీ మేయర్ మారేపల్లి సురేందర్ రెడ్డి, సీనియర్ కాంగ్రెస్ నాయకులు వినోద్ కుమార్, ఎన్పీ వెంకటేష్, సిరాజ్ ఖాద్రీ, తదితరులు పాల్గొన్నారు.
