వరంగల్: గీసుగొండ మండలం శాయంపేటలోని పీఎం మిత్ర కాకతీయ మెగా టెక్స్‌టైల్ పార్కులో నిర్వహిస్తున్న వివిధ టెక్స్‌టైల్ యూనిట్లలో టైలరింగ్‌లో ఉపాధి అవకాశాలు కల్పిస్తున్నట్లు జిల్లా కలెక్టర్ డాక్టర్ సత్య శారద ప్రకటించారు.
ప్రాథమిక టైలరింగ్ నైపుణ్యాలు కలిగిన 18 నుంచి 35 సంవత్సరాల మధ్య వయస్సు గల అభ్యర్థులు దరఖాస్తు చేసుకోవడానికి అర్హులని కలెక్టర్ తెలిపారు. నైపుణ్యం కలిగిన యువత టెక్స్‌టైల్ పార్కులో ఉపాధి అవకాశాలను సద్వినియోగం చేసుకోవాలని ఆమె కోరారు.
ప్రాజెక్ట్ స్థాపనకు భూమిని అందించిన భూమి కోల్పోయిన వారికి ప్రాధాన్యత ఇవ్వబడుతుంది. సంగెం, గీసుగొండ మండలాలతోపాటు వరంగల్ జిల్లాలోని ఇతర ప్రాంతాలకు చెందిన అర్హులైన యువత కూడా దరఖాస్తు చేసుకోవచ్చు.
ప్రతి సోమవారం కలెక్టరేట్‌లో నిర్వహించే ప్రజావాణి కార్యక్రమంలో సంగెం, గీసుగొండ మండలాల్లోని తహశీల్దార్ కార్యాలయాల్లో, జిల్లా గ్రామీణాభివృద్ధి కార్యాలయంలో (డీఆర్‌డీవో) లేదా ప్రత్యేక డీఆర్‌డీవో డెస్క్‌లో దరఖాస్తులు సమర్పించవచ్చు.
