హనుమకొండ: జూబ్లీహిల్స్ ఉప ఎన్నికల్లో కాంగ్రెస్ అభ్యర్థి నవీన్‌ యాదవ్‌ ఘనవిజయం సాధించినందుకు గానూ అవిభక్త వరంగల్ జిల్లాకు చెందిన ప్రజాప్రతినిధులు ముఖ్యమంత్రి రేవంత్‌ రెడ్డిని కలిశారు.
దేవాదాయ శాఖ మంత్రి పొంగులేటి శ్రీనివాస్‌రెడ్డి, పంచాయతీరాజ్‌శాఖ మంత్రి దనసరి అనసూయ సీతక్క, పాలకుర్తి ఎమ్మెల్యే యశస్వినిరెడ్డి, టీపీసీసీ ఉపాధ్యక్షురాలు ఝాన్సీ రాజేందర్‌రెడ్డి హైదరాబాద్‌లో ముఖ్యమంత్రిని కలిసి శుభాకాంక్షలు తెలిపారు.
ఈ సందర్భంగా ముఖ్యమంత్రి మాట్లాడుతూ పార్టీ శ్రేణుల సమష్టి కృషి ఫలితమే ఉప ఎన్నికల విజయం అని అన్నారు. జూబ్లీహిల్స్‌లో ప్రణాళికాబద్ధంగా ప్రచారం నిర్వహించడంలో వరంగల్ జిల్లా ప్రజాప్రతినిధుల కృషి, పార్టీ కార్యకర్తలు సమన్వయంతో కృషి చేయడం అభినందనీయమన్నారు. మంత్రులు, ఎమ్మెల్యేలు, కార్పొరేషన్ చైర్‌పర్సన్‌లు, రాష్ట్ర, జిల్లాల ముఖ్య నేతలు, పార్టీ కార్యకర్తలు విజయంలో కీలకపాత్ర పోషించారని పేర్కొన్నారు.
అభ్యర్థి గెలుపు కోసం డివిజన్ స్థాయి నాయకులు, బూత్ స్థాయి కార్యకర్తలు సమన్వయంతో కృషి చేయడం అభినందనీయమని ముఖ్యమంత్రి పేర్కొన్నారు. వరంగల్ జిల్లాకు చెందిన కాంగ్రెస్ కార్యకర్తలు విశేష కృషి చేశారని కొనియాడారు.
ఉప ఎన్నికల సమయంలో అహోరాత్రులు శ్రమించిన పాలకుర్తి సమ్మక్క–సారక్క బృందం (ఎమ్మెల్యే యసస్విని రెడ్డి, టీపీసీసీ ఉపాధ్యక్షుడు ఝాన్సీ రాజేందర్‌రెడ్డి) అలుపెరగని కృషిని సీఎం రేవంత్‌రెడ్డి ప్రత్యేకంగా ప్రస్తావించారు.
కాంగ్రెస్ అభ్యర్థి విజయం సాధించడంలో తమ సేవలు ఎంతో విలువైనవని అంగీకరించారు.
ఈ సమావేశంలో రాష్ట్రంలో జరుగుతున్న అభివృద్ధి కార్యక్రమాలు, సంక్షేమ పథకాలు, రానున్న స్థానిక సంస్థల ఎన్నికలు, పార్టీ బలోపేతంపై ముఖ్యమంత్రి చర్చించారు. జూబ్లీహిల్స్ ఉప ఎన్నికల ఫలితాలు ప్రభుత్వం అమలు చేస్తున్న ప్రజాకేంద్రీకృత పాలనపై ప్రజలకున్న నమ్మకాన్ని ప్రతిబింబిస్తున్నాయని ఆయన అన్నారు.
